veganismu
El veganismu consiste en nun facer usu los animales non humanos nel nuesu día a día. Poro aporfiamos:
- Alimentación 100% vexetariana (poro, nun comiendo cadábres d'otros animales nin derivaos llácteos, güevos o miel).
- Utilizando ropa ya complementos que nun incluyan cueru, llana o seda.
- Evitando los productos testaos o esperimentaos n'animales non humanos.
- Nun diendo a les cárceles d'animales non humanos, nomaos zoolóxicos o acuarios...
- Rebolgar nel nuesu tiempu llibre ensin esclavizar, esplotar o utilizar a otros animales (nun diendo a circos qu'aína utilicen animales non humanos o a folixes nes que rebólganse per aciu d'ellos).
- Evitando actitues que perxudiquen a los animales non humanos.
Los/es veganos/es lo somos por mor d'ética, porque nun ye xusto siguir usando ya perxudicando a los animales non humanos. Tal ya como dixo la escritora Alice Walker,
"Los animales (non humanos) esisten nel mundiu poles sos razones d'ermunu. Nun foron fechos pa ( l'animal) human, talamente que la xente prieta nun foi fecha pa los blancos, ni la muyer pa'l home".
Planteemos un supuestu:
- Imanxina qu'aporta un tercer ser a esti planeta, ya ye omnívoru, como los animales humanos (podemos alimentanos con ingredientes d'oxigen animal o vexetal, polo que nun necesitamos alimentanos usando a otros animales, poro, podemos ser 100% vexetarianos).
- Imaxina que ven a la especie humana como una más de les milenta qu'habiten esti planeta, ya nun atalanten el llinguax humanu (neto que nun atalantamos el llinguax de los gochos, perros, páxaros, pexes,...).
- Imaxina que munchos d'ellos arramplen cola nuesa llibertad ya asesínanos pa comese los nuesos cadábres en cachinos, a pesar que pueden ser 100% vexetarianos.
¿Sedría xustu qu'arramplaren cola to vida en cuantes son omnivoros ya poro nun necesiten comer ingredientes d'orixen animal?
- Imaxina que gusta-yos la lleche de humanes y, anque nun la necesiten pa la salú de so, siguen bebiéndola (o faciendo quesos ya yogures con lleche humana). Pa ello encierren les muyeres humanes en cárceles (en dalgunos casos son cárceles más grandes nomandoles granxes ecolóxicas), ya anden-yos nes sos cliques pa inseminales artificialmente escontra la so voluntá cola fin de dexales prenaes ya facer lleche (realmente la lleche creenla les mas p'alimentar a les sos críes).
- Imaxina qu'al ñacer los fios humanos son allonxaos de les sos mas (col duelgu emocional pa les mas ya fios/es), pa que nun se beban la lleche.
- Imaxina que los/es fíos/es nun van a guarderíes sicasi a otres cárceles, u son alimentaos/es con agua ya polvos con carencia en fierru pa provoca-yos anemia, asina que la so carne seya más cande ya nieta, ya a los pocos meses, en cuantes espoxigaren lo suficiente, son llevaos al mataderu pa ser asesinados/es pa dempues vender los sos cadabres en cachinos (nun escaezcamos que la carne xatu ye carne de cria).
- Imaxina que demientres esto asocedía tuvieron-y desaposiando día a día la lleche a les madres humanas, succionándo-y'l tetu escontra de la so voluntá ya cuando queda-yos poca lleche inseminanles otra vegá escontra la so voluntá pa dexarles preñaes, tornando a desaposiar los sos fios/es cuando ñacen, tornando a matar los sos neños ya tornando a desaposiar la lleche succionan-y el tetu.
- Imaxina que cuando'l "dueñu-propietariu" considera que ya nun-y sal a cuenta decide llevar a les mas al mataderu pa matales a los 35 años.
¿Sedría xustu perxudicar a los animales humanos pol "caprichu" de comer o beber ingredientes d'orixen animal?
¿Aceutaríes qu'estos terceros seres encarcelaren ya forciaren el preñar de los animales humanos (pa que ñazcan munchos humanos), cola sida de facer zapatos, bolsos, cinchos,... col peyellu arramplao de los animales humanos?
Imaxines que los animales humanos son encarcelaos e inseminaos escontra la so voluntá (pa que ñazcan munchos), cola sida d'esperimentar nellos, poro facense-yos:
- Inyectanse-yos sustancies nel calcañu.
- Introducense-yos sustancies nocives pola ñariz o boca fasta’l butiellu, mediante tubos.
- Amburase-yos pa poder facer estudios.
- Taraza-yos la médula espinal pa dexalos tetrapléxicos ya estudiar la tetraplexia que padezcan los terceros seres.
- Ampútanse-yos ya estripense-yos los muérganos vitales pa que terceros seres sacaren porgüeyu.
- Viviseccionase-yos (en vivo pa poder ver los muérganos internos, demientres el coral baltia)
- Etc.
Todo esto escontra de la so voluntá...
¿Aceutarías que t'utilizaren preseu de llaboratorio anque d'eso sacaren porgüeyu terceros seres?
¿Veríes xustu que t'encerraren de por vida en cárceles, les que tendrien el nomatu de zooolóxicos ya acuarios, pa dempués visitar eses instalaciones ya podete ver, o que se rebolgaren per aciu tuyu?
Lo inxustu nun ye cómo, ónde nin por qué s'esplota, perxudica o asesina a los animales non humanos, sinon la esistencia de la esplotación ya l'asesinatu.
Toos/es podemos arimar el llombu polos animales non humanos,
faciendo algo tan cenciellu como dexar d'usalos.
Toos/es podemos ser veganos/es.
Tú pues ser veganu/a.
